اَللّٰهُمَّ صَلِّ وَسَلِّمْ عَلَی نَبِیِّـنَا مُحَمَّد
| بندۂ حق، رسولِ حق | تجھ پہ اتر گئی کتاب |
| تیری حیات سر بسر | امتِ حق کا ہے نصاب |
| رتبۂ عبدہٗ ملا | اس سے بڑا شرف کہاں |
| رب کے حضور رات بھر | آنکھ میں اشکِ بے حساب |
| غارِ حرا کی خلوتیں | دشتِ عرب کی گرمیاں |
| جن سے اٹھا جہان میں | فکر و نظر کا انقلاب |
| خاک نشیں تھا تو مگر | لرزہ بہ تختِ قیصری |
| فقر ترا غیور تھا | تخت و کلہ تھے سب سراب |
| تیری اطاعتوں سے ہی | ہم کو خودی کی سلطنت |
| چھوڑ کے تیری راہ کو | قوم ہوئی ہے یوں خراب |
| تجھ پہ ہوا تمام دیں | تجھ پہ رسالتیں تمام |
| کوئی نبی نہ آئے گا | بند ہوا وحی کا باب |
| رب کی رضا سے حشر میں | تیری شفاعتوں کی آس |
| شرط مگر یہی کہ ہو | تیرا طریق انتخاب |
| صلِّ علیٰ ہے ہر نفس | لب پہ ہے یہ دعا مدام |
| دل سے اٹھیں گے اس طرح | غفلت و جہل کے حجاب |
| مجھ کو بھی اے خدا ملے | تیرے نبی کی پیروی |
| حوضِ نبی کا جام ہو | روزِ جزا میں کامیاب |
ہمراز
Hamraz