دنیا بھر کے معتبر علمی جرائد سے منتخب اوپن ایکسس تحقیقات، تراجم، علمی خلاصے اور تجزیے

عالمی علمی تحقیقات

دنیا بھر کی علمی تحقیق تک اردو قارئین کی رسائی

عالمی علمی تحقیقات روایہ کا ایک علمی منصوبہ ہے جس کا مقصد دنیا کے معتبر تحقیقی جرائد میں شائع ہونے والی منتخب آزاد رسائی کی تحقیقات کو اردو قارئین تک پہنچانا ہے۔

اس شعبے میں صرف ایسے علمی و تحقیقی مواد کو شامل کیا جائے گا جس کی اشاعت، باز اشاعت، ترجمے یا علمی استفادے کی اجازت اس کے ناشر یا اجازت نامے کے تحت حاصل ہو۔

اس شعبے میں کیا شائع ہوگا؟

:اس منصوبے کے تحت درج ذیل نوعیت کا مواد پیش کیا جائے گا

اصل تحقیق کی باز اشاعت: ایسی منتخب تحقیقات جن کے اجازت نامے میں مکمل متن کی دوبارہ اشاعت کی اجازت موجود ہو۔

اردو تراجم: ایسی اہم عالمی تحقیقات کے معیاری اردو تراجم جن کے اجازت نامے میں ترجمے اور تبدیلی کی اجازت ہو۔

تحقیقی خلاصے: اہم تحقیقات کے جامع مگر مختصر خلاصے، تاکہ قاری کم وقت میں تحقیق کے بنیادی سوال، طریقۂ کار، نتائج اور اہمیت سے واقف ہوسکے۔

تجزیہ و تعارف: منتخب تحقیقات کا علمی تعارف، تنقیدی مطالعہ اور ان کے علمی پس منظر کی وضاحت۔

علمی دیانت اور حقوقِ اشاعت

ہر باز شائع یا مترجم تحقیق کے ساتھ اصل مصنف، تحقیقی جریدے، سنِ اشاعت، اصل ربط، مستقل رقمی شناخت اور اجازت نامے کی معلومات واضح طور پر درج کی جائیں گی۔

جہاں متن میں ترجمہ، اختصار یا کوئی دوسری تبدیلی کی جائے گی، وہاں اس کی صراحت کی جائے گی۔ ایسے مواد کو دوبارہ شائع نہیں کیا جائے گا جس کے حقوقِ اشاعت یا اجازت نامے سے اس کی اجازت ثابت نہ ہو۔

روایہ کا مقصد

اس منصوبے کا مقصد دوسروں کے علمی کام کو محض نقل کرنا نہیں، بلکہ عالمی علمی تحقیق اور اردو قارئین کے درمیان ایک معتبر علمی رابطہ قائم کرنا ہے، تاکہ اہم تحقیقات زبان کی رکاوٹ کے باعث اردو علمی دنیا کی دسترس سے باہر نہ رہیں۔